Ба устод Сотим Улуғзода

Ба муносибати 115-солагии Сотим Улуғзода

ХОБИ ОРМОН

Имшаби торику ваҳмӣ
Хоб дидам то пагоҳон.
Ҳамчу ашки осмонҳо
То саҳар мерехт борон.

Рӯдакӣ омад ба хобам,
Дидагонаш буд бино.
Дафтару девони ӯ буд
Ҳамчунон «Шоҳнома» барҷо.

Хоби неке сода мекард
Ормонҳои азалро:
Буалӣ Сино кушода
Оқибат банди аҷалро.

Хоби хуш дидам: Ҳилолӣ
Буд маҳбуби Хуросон,
Сангдилҳояш накарда
Ҳеҷ гоҳе сангборон.

Хоб дидам, хоби ширин:
Аҳмади Дониш тавоност.
Чун бузургонаш ҳамеша
Мардуми тоҷик доност.

Хоб дидам, пушти Айнӣ
Зарбаи чӯбе нахӯрда,
Аз ҷаҳон дар синаи реш
Ӯ дили захмӣ набурда.

Хоби хуш дидам: набуда
Дарбадар алломаи Тӯс,
Оқиле ҳам нест ранҷур,
Шоире ҳам нест маҳбус…

Хоб дидам, аз ду дида
Ҷои ашк истора резам…
Хобам аз бедориам беҳ,
Мон, аз ин хобам нахезам.

Низом Қосим