Шумораи 12-уми Нашрияи мил­лии адабии Иттифоқи нависанда­гони Тоҷикистон «Садои Шарқ» аз чоп баромад.

Дар саҳифаҳои аввали моҳно­ма матни суханронии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Симпозиуми байнал­милалии «Бобоҷон Ғафуров – бу­зургтарин муҳаққиқ ва муаррифи­гари таърихи халқи тоҷик», ки ба ифтихори 115-солагии академик Бобоҷон Ғафуров 5 декабри соли 2023 баргузор гардида буд, ҷо дода шудааст.

Ғазалҳои тозаи Шоири халқии Тоҷикистон Гулрухсор Сафӣ чан­дин саҳифаи дигари «Садои Шарқ»-ро рангин кардаанд, ки фарогири мавзуъҳои Ватан, Ду­шанбе ва тасвири зебоиҳои таби­ати диёрамон ва ғайра мебошанд.

Барои хонандагони хурдсол пора аз «Қиссаҳои Нахӯдак»-и нависанда Азизи Азиз пешниҳод шуда, ки бо услуби қисса-афсона эҷод гардидааст. Лаҳзаҳои аҷиби ҳаёти Нахӯдак кӯтоҳ-кӯтоҳ оварда шудаанд.

Ғазалҳои тозаэҷоди Нави­сандаи халқии Тоҷикистон Гурез Сафар аз худшиносиву ифтихори миллӣ ва ҷавонмардии тоҷикон мегӯянд.

Аз китоби дувуми «Захмҳои ҳиҷрат»-и Мирзо Шукурзода аз овони дар дашти Дилварзӣ ба обо­дкорӣ машғул гардидани сокинони ноҳияи Масчоҳ хотираҳо оварда шудаанд. Дар ин хотираҳо дар бораи устодон Мирзо Турсунзода ва Боқӣ Раҳимзода ҳам сухан ме­равад, ки бо мардуми меҳнатқари­ни Дилварзӣ вохӯриҳои судманду баёдмонданӣ доштаанд.

Чанде пеш шоир Зиё Абдулло 70-сола шуд. Маҷалла ба ин му­носибат ғазалу рубоӣ ва байтҳои ӯро ба хонанда пешниҳод медо­рад. Чорпора, ғазал ва шеърҳои нимоии Иззатбек Идизода дар мавзуъҳои Тоҷикистон, забони тоҷикӣ, падар эҷод гардидаанд.

Дар саҳифаи тарҷумаи маҷал­ла идомаи фоҷиаи «Электра»-и Софокл дар тарҷумаи Шоири халқии Тоҷикистон Низом Қосим пешкаш шудааст.

Ҳамчунин маҷалла дигар мақо­лаву навиштаҳои муаллифонро ба хонандаи завқпарвари хеш манзур намудааст.