Таъсиси ду ҷоизаи нав барои Ҷашнвораи байналмилалии филмҳои “Тоҷи Сомон”
Дар чаҳорчӯби дувумин давраи ҷашнвораи байналмилалии филмҳои Душанбе – “Тоҷи Сомон”, ки рӯзҳои 15-20-уми октябр дар шаҳри Душанбе баргузор мегардад, ду ҷоизаи нав – “Синамо бидуни марз” ва ҷоизаи Президенти Ҷумҳурии Тоҷикистон созмон дода шуд.
Ин нукта рӯзи 1-уми август дар ҷаласаи Кумитаи тадорукоти II Ҷашвораи байналмилалии филмҳои “Тоҷи Сомон” садо дод.
Тибқи иттилоъи дафтари матбуотии “Тоҷикфилм”, ин ибтикор вежагии муҳимми дувумин давраи ҷашнвораи байналмилалии филмҳои “Тоҷи Сомон” буда, ин ҷоизаҳо «барои саҳми муносиб гузоштан дар рушду тавсеаи дӯстӣ, ҳамкориҳои синамосозон, паёми сулҳ ва фарҳанги таҳаммулпазирӣ” тақдим хоҳад шуд.
Мутобиқи низомномаи ҷашнвораи “Тоҷи Сомон”, дар ин давра филмҳои ҳунарии пурра ва кӯтоҳи ҳунарие, ки дар давоми солҳои 2023-2025 сохта шудаанд, ширкат карда метавонанд.
Ёдоварӣ мекунем, ки Ҷашнвораи байналмилалии филмҳои Душанбе – “Тоҷи Сомон” дар ду сол як бор баргузор мегардад. Нахустин давраи он рӯзҳои 15-19 октябри соли 2023 дар Душанбе барпо шуда буд.
Ба навиштаи вебгоҳи “Тоҷикфилм”, “Тоҷи Сомон” номгузорӣ шудани ҷашнвораи филмҳо омилу ҷанбаҳои худро дорад. Масалан, агар “Тоҷ” – тоҷдор, тоҷвар, соҳибтоҷу соҳибдавлат будани миллати куҳанбунёди тоҷикро ифода кунад, “Сомон” – номи сулолаи аввалин давлати миллии тоҷикон дар асрҳои IX-X маънидод мегардад.
www.adab.tj
