Вохӯрии адибони тоҷик ва рус

Дар Осорхонаи миллии Тоҷи­кистон 22 октябр намоиши 12-уми байналмилалии «Китоби Душанбе» оғоз ёфт.

Дар намоиш беш аз 40 ношир зиёда аз 5000 китоби тозанашрро пешниҳод карданд. Дар он намо­яндагони корхонаҳои табъу нашри давлатҳои ИДМ, инчунин Эрон, Ҳин­дустон, Туркманистон, Чин, Русия, Туркия ва ноширони Тоҷикистон иштирок доранд.

Дар доираи ин иқдом дар маҷлис­гоҳи осорхона бо мусоидати кумитаи тадорукот, Иттифоқи нависандаго­ни Тоҷикистон ва Маркази илмию фарҳангии «Россотрудничество» мулоқоти адибони Тоҷикистон ва Фе­дератсияи Русия доир гашт. Нахуст бахшида ба 210-солагии адиби бу­зурги рус Михаил Лермонтов адибон ва пажӯҳишгарони рус маърузаҳо пешкаш намуда, доир ба зиндагӣ ва фаъолияти эҷодии ӯ маълумоти судманд доданд. Раиси Иттифоқи нависандагони Тоҷикистон Низом Қосим иброз дошт, ки бо шеърҳои Лермонтов аз замони шуравӣ хо­нандаи тоҷик ошноии наздик дорад ва навиштаҳои адибро бештар шо­ири тавоно Ҳабиб Юсуфӣ тарҷума кардааст.

Сипас дар вохӯрӣ оид ба ҳамко­риҳо дар соҳаи тарҷума ва нашри китоб мубодилаи афкор карда шуд. Шоирони халқии Тоҷикистон Низом Қосим, Камол Насрулло, адибиёт­шинос ва тарҷумон Абдураҳмон Абдуманнон, адиби рус Максим Аме­лин, адиби русизабони Ӯзбекистон Евгений Абдуллоев, шоири ҷавони рус Н. Василий ва дигарон сухан гуфтанд. Абдураҳмони Абдуманнон аз таърихи тарҷумаи бадеӣ байни тоҷикон, русҳо ва дигар миллатҳои собиқ Иттиҳоди Шуравӣ андешаронӣ карда, дар бораи таҳия, тарҷума ва нашри тазкираи панҷҷилдаи адибони давлатҳои ИДМ маълумот дод. Ка­мол Насрулло, ки бештари ашъори ин тазкираро тарҷума кардааст, аз бардоштҳояш сухан гуфт. Евге­ний Абдуллоев дар атрофи корҳои анҷомнаёфта, вале муҳим дар соҳаи тарҷума ҳарф зада, чанд пешниҳода­шро ба ҷамъомадагон расонид.

Дар охир таъкид гардид, ки му­лоқоти адибон ва тарҷумонҳо ба­рои беҳтар гаштани ҳамкориҳо дар масъалаи тарҷума ва нашри асарҳои бадеӣ саҳми арзишманд дорад.