Ёдбуди раҳнамои адибон
Рӯзи 26-уми ноябр дар толори Хонаи адибони ба номи Мирзо Турсунзодаи Иттифоқи нависандагон ба муносибати 100-солагии мунтақиди саршинос, узви вобастаи Академияи миллии илмҳои Тоҷикистон Соҳиб Табаров конфронси илмӣ-адабӣ баргузор гардид.
Муовини аввали раиси Иттифоқи нависандагон Ато Мирхоҷа конфронсро ифтитоҳ бахшид.
Гардонандаи маҳфил Шоири халқии Тоҷикистон Аскар Ҳаким дар раванди конфронс дар бораи шахсият ва пажӯҳишҳои густардаи Соҳиб Табаров андешаҳои худро баён намуд. Профессор Абдунабӣ Сатторзода дар бораи навиштаҳои ноқид маъруза хонд. Адабиётшиносон Абдулҳай Маҳмадаминов, Аламхон Кӯчарзода, Боймурод Шарифзода, Ҳафиз Раҳмон ва дигарон дар навбати худ аз саҳми Соҳиб Табаров дар рушди нақди адабӣ ёдоварӣ карданд.
Зикр гардид, ки Соҳиб Табаров ҳамчун ноқиди борикбин дар баррасии эҷодиёти адибонамон корҳои зиёде анҷом дода, мактаби нақдшиносии хешро ба мерос гузошт ва ба ҳайси омӯзгори сахтгир шогирдони зиёдеро пуштибону роҳнамо буд.
Дар охир яке аз пайвандони Соҳиб Табаров – Олим Табарзода хотираҳояшро дар бораи ӯ нақл карда, ба роҳбарияи ИНТ барои пос доштани хотири неки ин адабиётшиноси пуркору пурбор миннатдорӣ намуд.
