Дувумин синамоҷоизаи миллии “Тоҷи Сомон”

Аз 15 то 19-уми октябр дар шаҳри Душанбе Дувумин синамоҷоизаи миллии “Тоҷи Сомон” таҳти шиори “Қадршиносии ҳунари асил” бар­гузор гардид, ки синамогарон аз Эрон, Беларус, Озарбойҷон, Ӯзбе­кистон, Қазоқистон ва Русияро ба ҳам овард.

Дастандаркорони ин озмун ҳа­даф аз баргузории онро тарғиби дастовардҳои синамои миллӣ, тақвияти ҳамкории синамогарони Тоҷикистон ва пуштибонии ҷавонони боистеъдод унвон карданд.

Бояд гуфт, ки ба озмуни Сина­моҷоизаи миллии «Тоҷи Сомон» барои ширкат ва рақобат беш аз 50 филми ҳунариву мустанад ва пӯёна­моӣ пешниҳод гардида буд.

Барандагони ин синамоҷоиза рӯзи 17-уми октябр дар Кохи Суруш эълом шуданд.

Дар ин маросим Дилрабо Ман­сурӣ, муовини сарвазири Тоҷикис­тон суханронӣ карда, иброз дошт, ки Синамоҷоизаи миллии “Тоҷи Сомон” шумори зиёди ҳунарман­дони асил, ҷавон, коршиносон ва ҳаводорони баландзавқи синамо­ро аз кишварҳои гуногун ба ҳам оварда, барои мубодилаи афкор ва баррасии тамоюлҳои нави рушди синамои муосир арсаи васеъи касбӣ мегардад.

Таъкид гардид, ки дархости зиёд аз киностудияҳои давлатию хусусӣ ва шабакаҳои телевизионӣ нишони таваҷҷуҳи махсус ба синамоҷоиза буда, он ба густариши ҳамкорӣ ва рушди синамои муосир, шиносоӣ бо таърихи пурифтихору фарҳанги ғаниву воло ва вежагии миллӣ му­соидат мекунад.

Ҳамин тавр шоҳҷоизаи Дувумин синамоҷоизаи миллии “Тоҷи Сомон” ба филми “Моҳӣ дар шаст”-и Муҳид­дини Музаффар тақдим гардид.

Ҷоизаи «Беҳтарин филми мустанад» ба филми «Пайраво­ни ҳақиқат»-и Рустам Шоазимов, «Беҳтарин филми пӯёнамоӣ» ба филми «Зани порсо»-и Фирдавс Насруллозода, «Беҳтарин филми ҳунарӣ» ба «Дар талоши ҳақиқат»-и Манзаралӣ Шералӣ, «Беҳтарин филми дебют» ба филми «Фурӯғ»-и Одина Маҳмад, «Беҳтарин филми ҳунарии кӯтоҳ» ба филми «Модар»-и Нигина Раҷабова, «Беҳтарин коргардон» ба Рустам Отахонов барои филми «Танҳо ту», «Беҳтарин дизайн» ба Восеъ Набиев барои филми «Танҳо ту», «Беҳтарин на­ворбардор» ба Шуҳрат Қурбонов ба­рои филми «Танҳо ту», «Таваҷҷуҳи тамошобин» ба филми «Ғам»-и Му­заффар Шодиев, «Беҳтарин нақши кӯдакона» ба Зулайхои Абдуҳаким барои филми «Се хоҳарон», «Беҳта­рин нақши занона» ба Таҳмина Раҷабова барои филми «Зиндагӣ зебост», «Беҳтарин нақши мардона» ба Насриддин Нуриддинов барои филми «Зиндагӣ зебост», «Беҳтарин коргардон» барои филми «Зиндагӣ зебост» ба Далер Раҳматов, «Беҳта­рин танзим» барои филми «Мактаби мардонагӣ» ба Дилшод Раҳмонов эъто шуд.

Ҷоизаи ифтихории «Тоҷи Сомон» – «Килки заррин»-ро барои филмно­манависӣ Абдурофеъ Рабизода сазовор гардид.

Ҳамчунин барои ширкат дар ин синамоҷоиза ба филми «Ҳафт мар­вориди Шинг»-и Аслам Садриддин, «Ҳоло, ки ман ҷавонам»-и Ғолиб­шо Мусоев, «Садои тамаддун»-и Тоҳир Асрориён, «Фарзанди фа­рзонаи миллат»-и Иззат Самадӣ, «Мавлоно»-и Далер Ҳасанзода ва филми «Ҳафткӯл»-и Шавкат Муҳаммадиев дипломи Дувумин си­намоҷоизаи миллии «Тоҷи Сомон» дода шуд.

Гуфтанист, ки дар чаҳорчӯби Ду­вумин синамоҷоизаи миллии “Тоҷи Сомон” дарсҳои устод ва шогирд бо ширкати ҳунарпешаи халқии Русия Игор Клебанов, коргардон ва продюсери рус Александр Котт, кор­гардон ва продюсери эронӣ Маҳдӣ Фардқодирӣ, ҳунарпешаи шоистаи Русия Фарҳод Маҳдудов, коргардони саршиноси тоҷик Ҷамшед Усмонов, коргардон ва продюсери Афғони­стон Сиддиқ Бармак ва дигарон баргузор гардид.

Дар баробари ин дар доираи синамоҷоизаи мазкур Форуми бай­налмилалии “Осори ниёгон: таърих ва фарҳанги бузурги миллат дар си­намо”, Рӯзҳои фарҳангии кишварҳои Эрон, Русия ва Белорус барпо шуд.

Ёдоварӣ мекунем, ки Синамоҷо­изаи миллии «Тоҷи Сомон» дар доираи «Барномаи рушди кинои Ҷумҳурии Тоҷикистон барои солҳои 2023-2027» дар шаҳри Душанбе баргузор гардид.

Ардашер Пайванд, “АС”