Гулчине аз шеъри дирӯзу имрӯзи Чин
ЛИ БО
Шоири машҳури Чин аз даврони сулолаи Тан аз шоирони арҷманд аст ва дар ҷаҳон
низ дар радифи Пушкину Шекспир шуҳрат дорад.
Меҳр
Нохудои киштӣ
Ли Бо
Омодаи сафар аст,
Ногаҳон аз соҳилҳо
Навои суруд мешунавад:
Жарфнои ҳавзи «гули шафтолу»,
Ҳазорҳо метр аст
Вале амиқ нест мисоли он меҳре,
Ки Ван Лун ба ман бахшидаст.
ДУ ФУ
Яке аз бузургтарин шоирони Чин ва равшангари барҷастаи классикии сулолаи Тан аст.
Ӯ зодаи Хенан мебошад. Ду Фу ашъори зиёде ба мерос мондааст, ки теъдоди онро 1400 баршумурдаанд.
Фиребо
Резаборон аст…
Зи фасли сол чӣ гӯям, дареғ бехабарӣ.
Ту низ медонӣ,
Баҳор меояд,
Насими фарвардин
Зи кӯчаҳои пур аз абру тор мегузарад,
Вале қаиқ ба дарё чи гуна рахшон аст
Чу ташти пуроташ
Ба ранги сурх дурахшад ва низ дар саҳарӣ,
Ба мисли боғи гули шаҳри мо фиребо аст,
Ту низ менигарӣ.
ХОНУМ ЛИН ХЮЙИН
Меъмори машҳур ва шоири Чин. Тарроҳи муҷассамаи Қаҳрамонони халқ ва Нишони
давлатии Ҷумҳурии Мардумии Чин.
Табассум
Ҳамеханданд чашмонат,
Табассум гирди
лабҳои ту мечархад,
Мисоли ғунчаҳои гул,
Садафдандони ту зебост, мисли шабнами поке.
Ва шояд ин табассум аз Худои ишқу зебоист.
Ва шояд сояи обу суруди форами бод аст.
Табассум дар паноҳи гесувонат
мешавад пинҳон
Мисоли нур зери сояи гулҳо.
Ҷилои хандаи шеър аст,
Ё гулхандаи хуршед зери сояҳои абр,
Рахшон аст, тобон аст.
ЧИН БИАН ЖИЛИН
Мунаққид, шоир ва тарҷумони машҳури Чин
Нигоҳи шикаста
Чи руъёе,
дар ин шабҳои танҳоӣ,
Ту дар болои пул
истодаиву мавҷи дарёро назар дорӣ.
Нигоҳи аз тамошобини рӯят бехабар дорӣ.
Маҳи рахшон даруни кулбаамро медиҳад оро,
Ту хоби дигаронро мекунӣ зебо……
ФЕЙ МИНГ
Шоир ва тарҷумони шинохтаи Чин
Ситора
Тирамоҳ,
Ситораҳои само,
Гули баҳори абад.
Дина шаб ахтарҳо
мисли як тури сафед,
Чун ҳақиқат
равшан,
Ҳамчунон,
Сояи магнолиё
Рӯйи девори Шанхай
Чи равшан,
зебост…
Гули баҳору маҳи тирамоҳ якранганд.
ҶЕН ЧОЮ
Шоир ва адабиётшиноси маъруфи Чин
Фаромӯш
Чеҳраи нилуфар,
Интизори фасли
шукуфоист.
Насими сард намеояд,
Ва баргҳои тус
парвоз надоранд,
Чи иттифоқи ҳазин,
Боғ хомӯш аст
Ва холист аз мусиқии фарвардин.
Ба ёд меорам, мусофирам…
ЧИН Ю ГУАНЖУНГ
Шоир, нависанда ва мунаққид
Интизорӣ зери борон
Зери борон намои
тиру камон,
Ба гӯшамон бирасад,
мусиқии бедорӣ.
Ва чашми қурбоқа
Зи об берун шуд.
Ҳавзи нилуфарии сурх ҳаме
Мисли як шуълаи оташ ба зери борон аст.
Ҳама нилуфари боғ
ба сони рӯйи туанд.
Ман интизори туам,
Агар ҳамин лаҳза
дастҳоят ба дасти ман буданд,
Беибо мегуфтам,
Ки нозанини манӣ!
Ва соати дастам,
ҳамчунон мегӯяд,
Ки вақти омадани туст ҳанӯз.
Нилуфарон сурханд…
Тарҷума аз забони чинӣ
Иброҳим Дӯст ализод
