Акси замон дар “Ойина”

Театри намунавии минётураи «Ойи­на» аз замони таъсисаш то имрӯз миёни мардум маъруфияти хоса дорад. Ин те­атр ба номи устодони ҳунар Убайдулло Раҷабов, Саидмурод Мардонов, Раҳмондӯсти Қурбониён, Асланшоҳ Раҳматулло­ев, Тоҷинисо Саидова, Абуалӣ Муродов ва дигарон пайванди ногусастанӣ дорад, зеро дар бунёду рушди он саҳми эшон бузург мебошад.

“Ойина” замоне ба фаъолият оғоз кард, ки вазъи сиёсии кишвар ноором буд ва оташи ҷанги шаҳрвандӣ рӯз то рӯз аланга мегирифт. Ба ин нигоҳ на­карда, ҳунарпешагони театр ҳамарӯза пайи эҷод буданд ва барои руҳбаланд сохтани мардум ҷаҳд менамуданд. На­моишҳои “Ҷазираи беодам”, “Тафтиш”, “Вохӯрӣ”, “Ватан – модар”, “Забоншинос”, “Дар таваллудхона” ва “Оворагардҳо” аз офаридаҳои он солҳоанд.

Дар гуногунрангии барномаи театр саҳми асосгузори он, ҳунарманди маҳбу­би кишвар Убайдулло Раҷабов бузург аст. Асарҳои ӯ – “Дузд”, “Нома”, “Кворум” ва “Рӯзи таваллуд” ба барномаи доимии театр шомил буданд. Дар баробари ин, дар таҳияи намоишҳо аз осори нависан­дагоне чун Владимир Поляков, Михаил Задорнов, Леон Измайло ва Аркадий Инин истифода мешуд.

Мутаассифона, асосгузори театри намунавии минётураи “Ойина” устод Убайдулло Раҷабов ва чанд тан аз ҳунарпешагони фаъоли он имрӯз дар қайди ҳаёт нестанд, аммо фаъолияти театр чун қабл бо маром пеш меравад ва кори рафтагонро насли ҷавон идома дода истодаанд.

Ҳоло дар қатори ҳунарпешагони ши­нохта ва маҳбуб Асланшоҳ Раҳматулло­ев, Тоҷинисо Саидова, Абуалӣ Муродов ҳунарпешагони ҷавону умедбахше мисли Фирӯза Раҷабова, Шаҳбоз Раҷабов, Зафар Маликов,Тоҳир Мирзоаминов, Манучеҳр Раҳимов, Манзура Саидова, Амриддини Садриддин ва Шералӣ Қур­бонов дар театр фаъолият доранд ва ҳам ба навиштани намоишномаҳо ва ҳам ба иҷрои нақшҳову кори коргардонӣ машғуланд.

Намоишҳое, ки театри мазкур пеш­ниҳоди тамошобинон мегардонад, акса­ран ҳаҷвиянд. Тавре маълум аст, жанри ҳаҷв аз дигар анвои адабию ҳунарӣ бештар ба дили мардум асар мекунад. Аммо эҷоди асарҳои ҳаҷвӣ аз эҷодкор истеъдоди хос ва мушоҳидаву таҷрибаи ғаниро талаб менамояд. Ба ханда водор кардани мардум кори саҳл нест ва мақ­сад аз ҳаҷв низ танҳо хандонидан набу­да, балки ба ин восита ошкор намудани мушкилоту камбудҳои ҷомеа ва шахсони алоҳида мебошад.

– Имрӯз дар шабакаҳои иҷтимоӣ баъзеҳо гӯё ба эҷоди намоишҳои ҳаҷвӣ машғуланд. Ҳунарнамоии баъзе аз онҳо хуб аст, аммо қисми дигарашон бо муҳта­вои орӣ аз касбият ин навъи санъатро хор кардан доранд. Санъати ҳаҷв мазоҳу масхараи беасос нест, балки мақсади он нозукона ва дилчасп ошкор кардани камбуду нуқсонҳои ҷомеа мебошад. Агар ҳаҷву шӯхӣ барои кӯдакону наврасон нигаронида шудааст, бояд ҷанбаи тарби­явиро доро бошад, – мегӯяд директори театр Абуалӣ Муродзода.

Шоистаи зикр аст, ки театри “Ойина” дар назди Раёсати фарҳанги Мақомоти иҷроияи ҳокимияти давлатии шаҳри Ду­шанбе таъсис дода шудааст. Ин аст, ки яке аз вазифаҳои асосии он дар сатҳи ба­ланд гузаронидани ҷашну чорабиниҳои сатҳи ҷумҳуриявӣ ва шаҳрӣ мебошад. Дар аксар намоишҳои театрикунонида­шуда саҳми ҳунарпешагони ин театр ба­раъло мушоҳида мешавад. Имрӯзҳо, ки арафаи соли нави мелодист, эҷодкорони театр лаҳзае ором надоранд. Рӯзе, ки меҳмони театр шудем, тарроҳони либос Александра Генина, Тоҷинисо Каримова ва Наргис Розиқоваро машғули омода намудани либосҳои саҳнавӣ дарёфтем. Ҳунарпешагон банди таҳияи намоиши идона буданд, ки қарор аст дар Сирки давлатӣ баргузор шавад. Тавре роҳбари театр, Аълочии фарҳанги Тоҷикистон Абуалӣ Муродзода иброз дошт, ҳунарпе­шагони театр пайваста бо тамошобинони хеш дар иртиботанд.

– Аҳли эҷоди театри мо ҳамеша дар байни мардуманд. Бинои хусусии худро надошта бошем ҳам, намоишҳои мо пай­васта пешниҳоди бинандагон мегарданд. Имсол ҳайати эҷодии театр дар маҳбаси занонаи шаҳри Норак барномаи ҳунарӣ пешниҳод карданд. Аз тамошои барно­маи мо маҳбусон ниҳоят шод шуданд.

Тибқи супоришҳои Раёсати фарҳанги шаҳри Душанбе рӯзҳои ҷашн аксаран на­моишҳои мо дар мактаб – интернатҳо, хо­наҳои пиронсолон, маъюбон ва қисмҳои ҳарбӣ пешкаш карда мешаванд. Мо на танҳо дар пойтахт, балки дар ноҳияҳои дигари кишвар низ бо тамошобинон вомехӯрем.

Имрӯз ҳунарпешагони собиқадори театр Асланшоҳ Раҳматуллоев ва Ҳалим Сангинов ба сабту танзими намоиши телевизионӣ, ки ба соли нави мелодӣ бахшида шудааст, машғуланд. Ба муно­сибати Рӯзи қувваҳои мусаллаҳи Тоҷи­кистон Асланшоҳ Раҳматуллоев филми тозаеро рӯи навор овардааст, ки рӯзҳои ҷашн пешниҳоди бинанда хоҳад гашт.

Мо ба кормандони ин муассисаи фарҳангӣ барору комёбиҳо таманно дорем.

М. Халилзода, «АС»