Кӯҳ моро шукӯҳ омӯзад…
Барои дарёфти Ҷоизаи давлатии Тоҷикистон ба номи Рӯдакӣ
Шеър илм нест, аммо сарчашмаи маърифат аст. Шеър муҳаррики аслии башар барои даст ёфтан ба ҷаҳоне бартар ва беҳтар аст, зеро шеър ангезаҳоро бедор ва фикрро вусъат мебахшад. Ба қавли Мэтю Арнолд, шоир ва фарҳангшиноси англис, “Навъи башар ҳар рӯз беш аз пеш пай хоҳад бурд, ки ногузир аст ба шеър рӯй оварад, то шеър зиндагиро аз барои мо тафсир кунад, моро тасаллӣ диҳад ва пуштибонӣ кунад. Бидуни шеър илми мо ноқис хоҳад намуд. Шеър баёни пуршӯру эҳсосест, ки дар симои ҳамаи улум аст”.
“Қаламрави меҳр” маҷмуаи нисбатан фарогири осори манзуми Рустам Ваҳҳобзода буда, анвои гуногуни ашъори ӯро, ки бар асоси жанру навъ ва аҳёнан мавзуъ гурӯҳбандӣ шуда, ашъори солҳои охири ӯро фаро мегирад. Дар маҷмуаи мазкур маснавию қасида, ғазалу мусаммат, рубоию дубайтӣ ва такбайтҳо далолат бар тавоноӣ ва тасаллути шоир бар анвои гуногуни шеър доранд.
Рустам Ваҳҳобзода шоири андешаманд ва маънисаро аст. Таҳлили маҷмуи “Қаламрави меҳр” баёнгари ин нукта аст, ки Рустам бар асоси ҳаяҷоноти зудгузар ва таъсири ҳаводиси рӯзмарра шеър намегӯяд, балки маншаи сурудаҳои ӯро андешаву ҳикмати хосе ташкил медиҳад. Рустам ба ҳаводиси муҳит ва рӯзмарра низ, ки бар ҳаёти иҷтимоии мардум таъсиргузор ҳастанд, бетафовут нест, балки бо қудрати хираду андешаи баландпарвози хеш сабақҳои ибратомӯз андӯхта, нукоти тозаеро ба хонандаи хеш пешниҳод мекунад. Шеъри Рустам аз обишхӯри шеъри классикии тоҷик сарчашма мегирад. Ин дилбастагӣ ҳатто дар шеърҳои нав, сапед, ашъори кӯтоҳ ва сурудҳои шоир низ ба мушоҳида мерасад. Сарояндаи “Қаламрави меҳр” суннату навовариро дар ҳамбастагӣ бо якдигар дар сурудаҳои хеш ба кор мегирад. Дар шеъри Рустам шаҳомати шеъри Фирдавсӣ, ҳикмати Ҳофиз, латофати ашъори Саъдӣ ва андешаи Мавлавӣ ва Иқбол бо ҳам талфиқ шудааст. Дар маҷмуъ, аксари сурудаҳои шоир дар маҷмуаи “Қаламрави меҳр” ҷанбаи ҳамосӣ ва ҳикамӣ доранд. Чунин ба назар мерасад, ки аз шоирони муосир аз назари сабку баён беш аз ҳама Рустам Ваҳҳобзода таҳти таъсири сурудаҳои устод Муъмин Қаноат қарор дорад.
Ҷанбаи дигари ашъори Рустам Ваҳҳобзодаро мавзуи ситоиши арзишҳои волои маънавию башарӣ ва тараннуми муқаддасоти миллию инсонӣ ташкил медиҳад. Ҳамин таодул дар тули фаъолияти эҷодии шоир ба таври мутаносиб риоят мешавад, ки падидаи фавқулода нодир аст. Аз ҳамин ҷиҳат дар шеъри Рустам лағзишҳои фикрӣ, ақидатӣ ва дугонагии афкор камтар мушоҳида мешавад. Рустам дар масоили миллию ақидатӣ мавқеи устувору сутуданӣ касб карда, дар тули фаъолияти эҷодиаш ин мавзуъро такмилу тақвият додааст. Сабаби истеҳкоми нигариши шоир дар он зоҳир мешавад, ки ӯ масъалаҳои миллӣ ва арзишҳои маънавию инсониро бо масоили тағйирёбанда омехта намекунад, зеро арзишҳои миллию маънавӣ ва фарҳангии як миллат собиту доимӣ ҳастанд. Тафкику таҷзияи ин ду масъала кори осоне набуда, хоси ҳар як шоир ҳам нест. Ин гуна мавзеъгирӣ ба ҳиммату ҳикмати худи сухансароён бастагӣ дорад.
Ба ҳамин тартиб, дар тамоми шеърҳои маҷмуаи “Қаламрави меҳр” ҳамин хатти сюжет ба таври мутаносиб риоят шудааст, ки ин ҳамоҳангиро дар осори камтар шоире метавон мушоҳида кард.
Шоирон ду гуна мешаванд; гурӯҳе, ки шеърашон аз андеша ва ҳикмат маншаъ мегирад ва шоироне, ки шеърашон таҳти таъсири эҳсосот ва ҳаяҷоноти зудгузар эҷод мешавад. Ҳар ду ин навъи шеър ҳаққи мавҷудият дорад, мунтаҳо ашъоре, ки таҳти таъсири андеша ва ҳикмат суруда мешаванд, қобили истифода дар тамоми адвор буда, ашъори эҳсосотӣ ва шиорӣ хоси як давраи таърихӣ ҳастанд.
Рустам Ваҳҳобзода ба гурӯҳи шоирони ҳикматсаро дохил мешавад, ки дар сурудаҳояш талош мекунад, ки масъалаҳои амиқи башарӣ, маънавӣ ва миллиро инъикос намояд. Агар ба ашъори маҷмуаи “Қаламрави меҳр” таваҷҷуҳ шавад, ба таври возеҳ аён аст, ки он чи шоир дар даҳаи 80-и асри ХХ суруда, бо сурудаҳои кунунии вай аз назари таваҷҷуҳ ба арзишҳои миллию маънавӣ як навъ ҳамоҳанганд. Масалан, хатти фикрие, ки Рустам Ваҳҳобзода дар “Соқинома”-и хеш соли 1989 матраҳ мекунад, бо қасидаи “Оинаи якрӯӣ”-и шоир, ки дар соли 2020 иншо шудааст, дар ҳамоҳангии комил қарор доранд. Шоир 35 сол қабл дар “Соқинома”-и хеш гуфтааст:
Дуруде бар он пири донои Тӯс,
Ки хуршеду маҳ оядаш хокбӯс.
Ҷаҳонпаҳлавони ҷаҳони сухан,
Ҷаҳонхусрави ҷовидони сухан.
Ба сад обхези дигар Нӯҳи мост,
Ки “Шаҳнома” худ киштии руҳи мост.
Агар тоҷикеро пайи доварӣ
Ту аз чашми сӯзан бурун оварӣ,
Чу ришта шавад гар зи по то сараш,
Ҳамон “Шоҳнома” бувад дар бараш.
Шоир дар қасидаи “Оини якрӯӣ”, ки дар пайравии қасидаи маъруфи Хоқонии Шервонӣ эҷод кардааст, ҳамин мазмунро такмил дода, чунин ҳушдор медиҳад:
Эй толиби Сосонӣ, эй вориси Сомонӣ,
Кас домани ин давлат нагрифт ба осонӣ.
Ободии Меҳанро имрӯз ҳамебояд
Бозуи Каюмарсӣ, тадбири Сулаймонӣ…
Бар зарраи хоки мо сад чашми тамаъ боз аст,
Дар тангаи ин чашмон мову ту чу зиндонӣ.
З-ин танг ба парвоз ой, эй ақли ҷаҳонтасхир,
Симурғи ту аввал буд дар вусъати кайҳонӣ.
Яъне, дарди шоир дарди гузаро ва тамаъҷӯёна набуда, балки ҳамчун як тоҷики собитқадам бидуни манфиатҷӯӣ ва худнамоӣ ситоиши арзишу ифтихороти миллиро ҷузъи рисолати инсонии хеш медонад. Ҳамин тавозун дар тули фаъолияти эҷодии шоир комилан риоят шуда, бо шеваҳои гуногун таблиғу таъкид гардидааст.
Вижагии дигари шеъри Рустам дар он аст, ки корбурди устураҳои миллию маънавӣ дар ашъораш аз ибтидо то кунун ҳамчунон ба таври мутавозин истифода мешавад. Чунин таодул бад- ин маъност, ки шоир мехоҳад барои расидан ба қуллаи муродаш бо ду бол ба сӯи ҳадафи хеш парвоз намояд.
Хусусияти дигари шеъри Рустам Ваҳҳобзода ҷанбаи ҳамосӣ ва баёни шукӯҳмандест, ки дар ашъораш ба кор мегирад. Бостонгароӣ ва истифода аз калимаҳои фохири классикӣ аз хусусиёти мумтози шеъри шоир аст. Дар маҷмуъ шеъри ҳамосӣ ба ин гуна калимаҳо ва баёни шукӯҳманд ниёз дорад, балки ин равиш ҷузъи хусусиятҳои зотии шеъри ҳамосӣ аст. Ин равиш дар вазни “Шоҳнома”-и Фирдавсӣ фавқулода дурахшидааст ва табъи Фирдавсӣ ба ҳадде буда, ки дар зеҳн ин маъноро талаққӣ мекунад ва ангор, вазни мутақориб хоси осори ҳамосӣ бошад. Аммо воқеият ин гуна нест. Дар таърихи адабиёти тоҷик шоирони дигаре низ ҳастанд, ки мавзуи ҳамосаро дар авзони дигар низ ба таври мутантан сурудаанд. Дар асри ХХ Абулқосим Лоҳутӣ ва Муъмин Қаноат ҳамин роҳро идома дода, шеъри ҳамосиро дубора эҳё карданд. Рустам Ваҳҳобзода низ дар авзони гуногун тавони худро барои сурудани шеъри ҳамосӣ ба исбот расонидааст. Намунаи боризи он достони “Лозуркӯҳ” аст, ки дар шакли чаҳорпора суруда шуда, шукӯҳи ҳамосӣ дорад. Гарчанде то кунун дар робита ба ин достон нақди адабии муосир ба таври лозим изҳори назар накардааст, аммо бо муруре гузаро бо итминон метавон гуфт, ки “Лозуркӯҳ” яке аз беҳтарин достонҳои адабии даврони Истиқлол ба шумор меравад. Мавзуи достони мазкур рӯёрӯйи башар бо ду хатари азим, хатарҳои табиӣ ва маънавӣ аст. Шоир барои ҳалли хатароти ҷаҳони муосир пешниҳод мекунад, ки кишварҳо аз сабқати ҷунуномези тасарруфи манобеи табиӣ даст кашида, бо захираҳои сайёра муносибати инсонӣ дошта бошанд.
Достон дар баробари матраҳ кардани масъалаи доғи ҷаҳони муосир, яъне гармшавии иқлим ва об шудани пиряхҳо ҳамчунин аз назари тасвирсозӣ ва тозакориҳои шоирона низ саршор аст.
Достони “Лозуркӯҳ” аз ҷиҳати мундариҷаву муҳтаво ва ҷанбаи ҳамосии хеш ба достони “Тоҷикистон – исми ман”-и устод Қаноат шабоҳати наздике дорад. Дар ин ду достон як руҳи муштарак – руҳи тоҷики озодаву бунёдкор сайр мекунад. Дар осори устод Қаноат кӯҳ ҳамчун намоди устуворӣ ва ҷовидонагии руҳи тоҷик мавриди ситоиш қарор гирифта, шоир кӯҳро ба руҳи тоҷик ташбеҳ кардааст. Дар достони “Лозуркӯҳ”-и Рустам Ваҳҳобзода низ ҳамин ташбеҳ ба ҳамон маъно ба кор рафта, ҷилваҳои тозае аз он ба намоиш гузошта мешавад:
Кӯҳ моро шукӯҳ омӯзад,
Ҳиммат аст, он чи кӯҳ омӯзад.
Шоир дар бахши “Сафар”-и достони мазкур мавзуи фалсафаи кӯҳ ва иртиботи он бо руҳ ва фарҳанги тоҷикро ин гуна тафсир мекунад:
Танҳо зи ту илтимоси ман ин аст,
Аз ёд мабар шукӯҳи куҳҳоро.
Магзор, ки об аз осиё афтад,
Аз решаи ҷон ҷудо шавад дарё.
Тоҷик ҳамеша мисли бӯтемор
Бар саргаҳи об шишта ғам хӯрдаст.
То қисмати дигарон нагардад кам,
Нохӯрда, ба оби худ қасам хӯрдаст.
Шоир кӯҳу дарёро, ки дар якҷоягӣ аз онҳо бо номи намодини Лозуркӯҳ ёд мекунад, ду неъмати бебаҳо медонад, ки ҳаёту мамоти миллии мо ба онҳо вобаста аст. Аз сӯи дигар, ин ду сарвати бебаҳо дар тули таърих маншаи таҳдиди мо низ будаанд. Ин ду неъмат омили таъсиргузор дар ҳаёти башарият ба ҳисоб рафта, истифодаи оқилона аз онҳо имконияти фавқулодае барои ояндаи мо фароҳам хоҳад кард:
Дастони ситорарези дарёҳо
Сад чархаи нурро бигардонад,
Он қадр, ки деви зулмати инкор
Дар пойи шаҳомати ту сар монад!
Дар маҷмуаи “Қаламрави меҳр”, дар баробари достони “Лозуркӯҳ”, «Соқинома» ва қасидаи «Оинаи якрӯӣ» шеъру қасида ва маснавию мусамматҳои дигаре, аз қабили “Кӯҳистон”, “Тоҷикистон”, “Тоҷик”, “Тоҷикӣ”, “Шаҳри Хуршед”, “Гуфтугӯ бо пайкараи пардапӯши ҳаким Фирдавсӣ”, “Кабки дарӣ”, “Бухоро” ва ғайра ҷой гирифтаанд, ки мавзуи онҳоро ситоиши арзишҳои волои миллию маънавию башарӣ ва тараннуми муқаддасоти миллӣ ташкил медиҳад. Ҳамаи ин ашъор дар жанрҳои гуногун суруда шуда, нуқтаи муштараки онҳо мавзуъ ва баёни шукӯҳманди онҳо аст.
Рустам Ваҳҳобзода ба масъала ва мушкилоти дунёи муосир аз дидгоҳи умумибашарӣ ворид гардида, бо андешаҳои бикру ҳикматҳои дилпазир роҳи ҳалли мушкилотро бозкушоӣ мекунад. Бо ҳамон усуле, ки аз бомдоди зуҳури адабиёти тоҷик роиҷ шуд ва то кунун, ин суннати шоиста тавассути адибони мунавварфикри тоҷик идома ёфтааст. Ӯ натанҳо бо силоҳи шеър, балки бо эҷоди таронаҳои ватанӣ, ки сарояндагони маъруфи кишвар онҳоро месароянд ва ҳамчунин мушорикат дар баҳсу мунозираҳои доғи рӯз, ки дар шабакаҳои иҷтимоӣ мегузаранд, фаъолона ширкат намуда, бо мавзеъгириҳои хирадмандонаи хеш дар тарбияи руҳи ватанпарастии насли ҷавон ва таҳкими ҳувияти миллии онҳо рисолати равшангарии хешро ба хубӣ анҷом медиҳад. Ба қавли шоири инглис Филип Сидни, “Шеър бо тақвияти тахайюл дорои таъсири ахлоқӣ аст ва тахайюл ҳам ба навбати худ узви табиати ахлоқии инсон аст, зеро ҳамдилиро, ки бузургтарин василаи ахлоқ аст, мепарварад. Шоир бо тақвияти тахайюл ба таҳаққуқи хайри ахлоқӣ мадад мекунад”.
Китоби Рустам Ваҳҳобзода, Шоири халқии Тоҷикистон аз тарафи Раёсати Иттифоқи нависандагони Тоҷикистон барои дарёфти Ҷоизаи адабии ба номи Рӯдакӣ пешниҳод гардидааст ва бидуни шак, китоби мазкур ва сарояндаи чунин сурудаҳои ҳикматомӯз шоистаи дарёфти ин ҷоизаи муътабари адабӣ мебошанд.
Беҳрӯзи Забеҳулло,
мудири шуъбаи адабиёти муосири Институти забон ва адабиёти АМИТ