• Email: Этот адрес электронной почты защищен от спам-ботов. У вас должен быть включен JavaScript для просмотра.
  • Tel: (+992 37) 224-57-37 | (+992 37) 224-57-67

HomeШЕЪР

ПЕШВОИ МИЛЛАТ ва АДАБИЁТ

СУХАНРОНИҲО...

БОЗОР СОБИР РОҒУН

М. ҚАНОАТ

ПАНҶАМ НУР

Дар коргаҳи меҳр чӣ созӣ ту ба рӯз?

Дар ин шаби тирарӯ чӣ ҷӯӣ ту ба сӯз?

Хоҳам, ки ҳамон меҳри замон афрӯзам

Дар синаи Роғун, ки ниҳон аст ҳанӯз.

 

Пайғоми туро гирифта бо панҷаи шер,

Эҳёгари ту шуданд шерони далер.

Имрӯз бубин, ки оташ аз об раҳид,

Ҳар нола, ки буд асир, гардид амир!

Идомаи: БОЗОР СОБИР РОҒУН

М. ТУРСУНЗОДА МАРҲАБО

 

Духтари ӯзбек, моро гӯш кун!

Дигаронро андаке хомӯш кун.

Гӯш кун! Гапҳои мо беҳуда нест,

Ин садоҳои дили осуда нест.

Шавқи ту моро  ба илҳон оварад,

Рӯ ба сӯи Ӯзбекистон оварад.

То сухан чун қомати  мавзун шавад,

Дар сари ҳар мисрае дил хун шавад.

Кошкӣ, табъи равон медоштам,

Рӯдакиқудрат забон медоштам -

Менавиштам ҳусну алтофи туро,

Рӯи некӯву дили софи туро.

Ту магар он нестӣ, ки Шарқро

Аз нигоҳи хеш кардӣ пурсафо?

Шарқиён рӯи туро  чун дидаанд,

Гул зи боғи Ӯзбекистон чидаанд.

Ҳар куҷо, ки рафт гуфтугӯи ту,

Ӯзбекистон буд дар паҳлӯи ту.

Тоқии такдӯзии олампаноҳ,

Куртаи шоҳию чашмони сиёҳ,

Аз сари минбар сухангӯии ту,

Хотири аҳли  адабҷӯии ту…

Сомеонатро ба ҷӯш андохтанд,

Дил ба даст овардаву дил бохтанд.

Ёд дорӣ, дар лаби дарёи Нил

Мекашидӣ чун бари домони дил.

Духтари мисрӣ туро табрик кард,

Бо табасум хешро наздик кард.

Дер чашмонро ба сӯят дӯхт ӯ,

Аз нигоҳи ту сабақ омӯхт ӯ.

Ӯзбекистон дар барат истода буд,

Чун гулистону чаман озода буд.

Акси рӯятро ба об андохтӣ,

Моҳро аз Нил берун сохтӣ.

Мавҷҳои Нил пуртуғён шуданд,

Кафк бар лаб кардаву ҷӯшон шуданд.

Мавҷ озод аст, аммо бурда ранҷ -

Партизандухтар Ҷамила дар шиканҷ.

Гар хабар меёфт аз ташрифи ту,

Рақсҳо мекард бо таклифи ту.

Дӯстам, ранҷидан аз инсоф нест,

Ҳарчӣ дар ҳаққи ту гӯям, лоф нест.

Миср пур шуд аз ҳикоятҳои ту,

Хоки Ҳииндустон зи нақши пои ту.

Дар барат тоҷик чун хеши ту буд,

Шоира Амрита дар пеши ту буд.

Бо навои мутрибони хушнаво

Меҳмондории шарқӣ шуд бапо.

Рақси ҳиндӣ, шеъри русӣ ҷӯр шуд,

Суҳбати ширини ту машҳур шуд.

Маҷлиси моро қалам тасвир кард,

Мулки дилро дӯстӣ тасхир кард.

Ҳаст дар ёдам, ки ҳангоми сафар

Карда будӣ дӯстонатро хабар:

"Меҳмон дар Тошкенти мо шавед,

Аз тамоми Шарқ назди мо равед!"

Шарқиёнро даъватат  дар ёд монд,

Ҳар диле бо ёди рӯят шод монд.

Вақт омад, меҳмонон мерасанд,

Аз ҳама кишвар адибон мерасанд.

Духтари ӯзбек, соҳибхонаӣ,

Аз камию костӣ бегонаӣ.

Метавонӣ меҳмондорӣ кунӣ,

Дилнавозиҳои бисёре кунӣ.

Мамлакат дар ихтиёри туст, туст,

Ӯзбекистон дар канори туст, туст.

Ман ба ёрии ту шодон меравам,

На ба по, бо сар шитобон меравам.

Маҷлисороӣ туро хос аст, хос,

Хотири ёрони худро дор пос.

Даст дар бар карда, сӯи дар биё,

Меҳмон омад ба дар, гӯ:

                                            - Марҳабо!

Идомаи: М. ТУРСУНЗОДА МАРҲАБО

ТАКЯГОҲ

 

Эй халқи меҳрубон, эй ёри роҳи ман,

Ҳастам гувоҳи ту, ҳастӣ гувоҳи ман.

 

Бо ман ту ҳамтанӣ, ман бо ту ҳамтанам,

Ҳам ҷони ман туӣ, ҳам ҷони ту манам.

 

Як умр мазҳабат ободкорӣ аст,

Бунёнгузорӣ аст, бунёдкорӣ аст.

 

Мондаст дини пок аз Зардуҳишти ту,

Аз дони некӣ аст сарсабз кишти ту.

 

Будем ёри нек, будем хасми бад,

Мондем ҷовидон бо санъату хирад.

 

Пиндорамон - накӯ, гуфторамон - накӯ,

Рафторамон - накӯ, осорамон - накӯ.

 

Сабз аст умри ту аз донаи сухан,

Ҳар донаи сухан - дурдонаи Ватан.

 

Таърихи ту маро додаст обутоб,

Баҳрат гузашта ман аз оташу аз об.

 

Кардам ба гуфти ту, кардӣ ба гуфти ман,

Бо туст доимо гуфтушунуфти ман.

 

Бо чашми ҷону дил ман  дидаам дуруст -

Ин мулк то абад рӯшан зи ақли туст.

 

Ман дидаам дуруст - бахтат зи ваҳдат аст,

Гар ёри ваҳдатӣ, ёрат саодат аст.

 

Эй халқи сарбаланд, собит ба мисли кӯҳ,

Асли ѓурури ту мебахшадам шукӯҳ,

 

Мебахшадам тавон, мебахшад эътимод:

Фирдавс мешавад ин сарзамини род.

 

Эй халқ, мешавӣ озодатар аз ин,

Бар сарзамини хеш дилдодатар аз ин.

 

Ман ҳамдами туям дар ин раҳи умед,

Эй дилсафеди ман, бодо раҳат сафед!

 

Дар ин раҳи умед, эй мардуми Ватан,

 

Ман - такягоҳи ту, ту - такягоҳи ман!

СУРОҒА

  • (+992 37) 224-57-37 | (+992 37) 224-57-67
  • Этот адрес электронной почты защищен от спам-ботов. У вас должен быть включен JavaScript для просмотра.
  • 734025, Ҷумҳурии Тоҷикистон, шаҳри Душанбе. хиёбони Исмоили Сомонӣ 8
  • FAX (+992 37) 224-57-37