• Email: Этот адрес электронной почты защищен от спам-ботов. У вас должен быть включен JavaScript для просмотра.
  • Tel: (+992 37) 224-57-37 | (+992 37) 224-57-67

 

ИДОМАИ ТАШАББУСҲОИ «АДИБ»

 

Чанде пеш дар гулгашти Иттифоқи нависандагони Тоҷикистон китобҳои тозанашри нашриёти «Адиб» ба намоиш ва фурўш гузошта шуданд. Дар ин намоиш кормандони Вазорати корҳои дохилӣ ва ҷузъу томҳои ин сохтори қудратӣ иштирок доштанд. Ба иттилои директори нашриёти «Адиб» Давлат Сафарзода, иштирокдорони намоиш аз китобҳои адибони классику муосир фаровон харидорӣ намуда, ибратомўзи дигар ташкилоту муассисаҳо буданд ва ба татбиқи дастуру супоришҳои Ҳукумати Ҷумҳурии Тоҷикистон ҷиҳати китобхониву китобдорӣ таваҷҷуҳи махсус зоҳир намуданд.

Идомаи: ИДОМАИ ТАШАББУСҲОИ «АДИБ»

САДА - НУРЕ АЗ УМЕДУ ОРЗУ

 

Сада дар қатори Наврўзу Меҳргон аз даврони қадим яке аз ҷашнҳои бошукўҳи  мардумони эронитабор ба шумор мерафт. Моҳияти ҷашни Садаро пирўзии рўшноӣ бар торикӣ, гармо бар сармо ва некӣ бар бадӣ ташкил дода, мардум онро бо афрўхтани гулханҳои бузург гиромӣ медоштанд.

Идомаи: САДА - НУРЕ АЗ УМЕДУ ОРЗУ

ИН СӮВУ ОН СӮЙИ ДАРЁИ ПАНҶ

Имрўзҳо дар кишвар аз ҷониби намояндагони Иттифоқи нависандагони Тоҷикистон, Ҳаракати ваҳдати миллӣ ва эҳёи Тоҷикистон, Вазорати мудофиаи Ҷумҳурии Тоҷикистон, Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва дигар ниҳодҳо вохўриҳои хотирмон бо сарҳадбонон сурат гирифта истодаанд. Мақсад аз ин вохўриҳо расонидани салому паёми Сарфармондеҳи қувваҳои мусаллаҳи Ҷумҳурии Тоҷикистон муҳтарам Эмомалӣ Раҳмон, баланд бардоштани рўҳияи сарбозон ва ба онҳо барои ҳимояи марзу буми кишвар изҳори сипосу миннатдорӣ баён кардан аст.

Ҳайати мо бо ин мақсад бо роҳбарии муовини раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Ризо Назарзода ба Вилояти Мухтори Кўҳистони Бадахшон сафарбар гардид. Ду-се нафарӣ ба гурўҳҳо ҷудо шудем. Мо асосан аз қисмҳои ҳарбӣ ва дидбонгоҳҳои сарҳадии ноҳияҳои Дарвозу Ванҷ, ки ин ноҳияҳо дар ҳамсоягии Вилояти Бадахшони Ҷумҳурии Афғонистон мебошанд, дидан кардему бо ҳимоятгарони Ватан суҳбатҳо оростем. 

Пеш аз ҳама, бояд зикр кард, ки ин ду ноҳия низ ба баракати соҳибистиқлолии ҷумҳурӣ рўз то рўз ободтару зеботар гардида истодаанд. Мардумаш ба маънои том Истиқлолу Ваҳдату осоиштагиро дарк кардаасту бо ҳамин рўҳия зиндагӣ дорад. Шиорҳои ватандўстона, вожаҳои азизи Истиқлол, Ваҳдат, Сулҳ, муқаддасоти миллӣ-Парчаму Нишонро зиёд дар тахтасангҳои канори роҳҳо, дар девори кўҳҳои сарбагардун ҷо кардаанд. Тўли 5 рўз намояндагони ноҳияҳои Дарвозу Ванҷ, аз ҷумла, муовини аввали раиси ноҳияи Дарвоз Ҳаким Давлатзод, сардори бахши Раёсати кумитаи ҳолатҳои фавқулода ва мудофиаи шаҳрвандии ВМКБ дар ноҳияи Дарвоз подполковник Усмон Қурбонов ва дигарон бо мо ҳамроҳ буданду дастгирии бисёр карданд.   

Тавре роҳбарони қисмҳои ҳарбӣ ва дидбонгоҳҳои сарҳадӣ иброз доштанд, сарбозони мо барои ҳимояи хоки поки диёр аз ҳар ҷиҳат омодаанд ва шабонарўзӣ вазифаи муқаддаси худро бо сарбаландӣ иҷро карда истодаанд. Дар дарвозаи дидбонгоҳе аз дохил чунин навиштаро мушоҳида кардем:

«Сарҳадбон, дар сарҳад ҳушёр бош»!

Ин як ҷумлаи сода дар тақвими ҳар рўзи сарҳадбонон кифоя аст, ки доим ҳушёр бошанд. 

Касе, ки бори аввал ба ин мавзеъҳо меравад, бояд мушоҳидаи амиқ кунад, ки дар он сўйи дарёи Панҷ (Афғонистон) мардум чӣ гуна рўзу рўзгор доранду дар ин сўйи дарёи Панҷ (Тоҷикистон) чӣ гуна.

Ин сўйи дарё аз замони шўравӣ роҳи мошингарди асфалтпўш дорад, он сўйи дарё то ҳанўз роҳи тангу мумфаршнакардаи бо даст сохташуда. Ин сўйи дарё касе пиёда нест, мошинҳои зиёд дар ҳаракатанд, он сўйи дарё одамон бештар пиёдаанду бо гузашти соатҳо ягон-ягон мошин ё дучарха (мототсикл) пайдо мешавад. Ин сўйи дарё хати барқу телефон аст, он сўйи дарё ҳарду ҳам нест. Ин сўйи дарё хонаҳои замонавӣ зиёданд, он сўйи дарё манзилҳои вайрона… Чун дур нест, бо як нигоҳ метавон ин ҳамаро дид, қиёс кард ва шукри амнияту осоиштагии кишвари худро ба ҷой овард.

Мутаассифона, бар асари набудани амният он сўйи дарё ин ҳама ободиро надорад. Онҳо барқро аз мо мехаранд. Ҳатто аз симкортҳои ширкатҳои мобилии кишвари мо истифода мекунанд. Мо имрўз мехоҳем, ки ба кишварҳои мутараққии дунё наздик шавем. Аммо афғонистониҳо орзу доранд, ки монанди мо кишваре дошта бошанд, то дар он пеш аз ҳама сулҳ таъмин бошад. Ин ҳамаро мушоҳида карда, байти устод Абўабдуллоҳи Рўдакиро ба ёд овардам, ки баёнгари ҳол аст:

Ба рўзи неки касон, -гуфт, ғам махур зинҳор,

Басо касо, ки ба рўзи ту орзуманд аст!

Таманнои онро дорем, ки ҳар чӣ зудтар сокинони кишвари ба мо ҳамсояву ҳамзабон ба сулҳу ваҳдат ва истиқлоли комил бирасанд.

Бузургмеҳри ТОҶИДДИН

МЕҲРНОМАИ ВАТАН

Тоҷикистонро шоирон ҳам дар замони шўравӣ ва ҳам дар даврони истиқлол бисёр сурудаанду ситудаанд, биноан мепиндоштам, ки дар ин  мавзўъ сухане тоза гуфтан ва маъние бикр бар гуфтаҳо афзудан амрест ниҳоят муҳол. Вале манзумаи «Ман ту ҳастам Тоҷикистон»-и Камол Насрулло, ки аз силсилашеърҳо фароҳам омадааст, бароям як падидаи шигифтовар ва ҳайратангезест. Хушбахтона, ба Камол Насрулло муяссар гардидааст, ки чеҳраи таърихиву кунунӣ, арзишҳову муқаддасоти моддиву маънавӣ, ниҳоду сиришти тоҷику Тоҷикистонро аз дидгоҳи нав бубинад, ниёзу таманниёти ҳар ватандорро - аз сарвар то коргар, аз бузург то хурд - тавассути тавсифу тасвир ва лобаву ниёишҳои шоирона иброз дорад. «Ман ту ҳастам, Тоҷикистон!» - бо ҳисси ифтихор ва масъулият хитоб мекунад шоир ва ин Ватани азиз, ин сарзамини озарини меҳрро дар дилу вуҷуди хеш фаро мегирад, балки худро, яъне ҳар тоҷикро, тимсоли Тоҷикистон медонад. Ў дар варақи сангҳо сарнавишти сангини миллаташро мехонад. Ва дар чунин андеша аст, ки мо бояд «аз ниҳоди сангҳо симои худро» ва «аз варои сангҳо фардои худро» биёбем. Мо бояд пайкари худро аз ин кўҳҳои сангин падид орем. Ва дар ин тасвири мармуз як ҷаҳон маъниро гунҷоиш медиҳад. Дилгармӣ, рўҳбаландӣ ва бовари шоир хонандаро фаро гирифта, ба ояндаи нек ҳидоят мекунад.

Камол Насрулло муваффақ шудааст, ки Тоҷикистонро дар сиришти фард бигунҷонад ва вуҷуди фарди ватандорро то ҳадди Тоҷикистон вусъату шаҳомат бубахшад. Дар манзума чеҳраи азизу маҳбуби Тоҷикистон ва симову сиришти меҳрбори фарзанди тоҷик ба ҳам даромехта, як образи бадеии тавъамони Ватан ва ватандор арзи ҳастӣ намудааст. Ин падидаи тозаву нишотангез шоистаи таҳнияти шоир ва мояи ифтихори ҳар ватандор ва дўстдори шеър аст.

Абдураҳмони Абдуманнон

НИШАСТИ АВВАЛИ «ШЕЪР ВА ЗИНДАГӢ»

 

14-уми январи соли 2021 бо ибтикори бахши назми Иттифоқи нависандагони Тоҷикистон дар маҷлисгоҳи ин созмон маҳфили илмиву адабии «Шеър ва зиндагӣ» баргузор гардид. Нишасти аввали ин маҳфил ба мавзўи «Пайванди суннат ва навоварӣ дар шеъри имрўз» ихтисос дошт ва дар он шоирону адабиётшиносон ва алоқамандони шеър ширкат варзиданд.

Муовини аввали раиси Иттифоқи нависандагони Тоҷикистон Ато Мирхоҷа дар оғоз изҳор дошт, ки ба роҳ мондани чунин маҳфил муҳиму саривақтӣ буда, боиси гуфтугузори судманд ва ба миён омадани матлабҳои ҷолиб мегардад. Номбурда ба маҳфил ҳусни оғоз бахшида, ба кори минбаъдаи он барор хост.

Гардонандаи маҳфил, Шоири халқии Тоҷикистон Аскар Ҳаким дар атрофи мавзўи мавриди баррасӣ ба таври мухтасар мулоҳиза ронда, онро аз ҷумлаи муҳимтарин масъалаҳои шеър ба шумор овард.

Дар қисмати аввали маҳфил, ки шеърхонист, ровии хушлаҳну хушсадо Муҳаббат Мирзораҳимова ғазали дилошўберо аз Мавлоно бо маҳорати хос қироат кард ва табъи ҷамъомадагонро болида намуд. Шоирони ҷавон Бобаки Суғдӣ ва Рустами Аҷамӣ намунае аз ашъори худро манзури ҳозирин намуданд ва пазироии хуб ёфтанд.

Дар қисмати асосии маҳфил Шоири халқии Тоҷикистон, пажўҳишгари маъруф Рустам Ваҳҳобзода дар атрофи мавзўи «Пайванди суннат ва навоварӣ дар шеъри имрўз» суҳбати пурмуҳтаво кард. Номбурда бо таваҷҷуҳ ба манзараи умумии шеъри имрўзамон, махсусан шеъри ҷавонон, аз ҷумла изҳор дошт, ки шеъри суннативу нав бо ҳам пайванди ногусастанӣ доранд ва якеро бе дигаре наметавон тасаввур кард. Бисёр қолабҳои суннатии мо, ки дар қарни гузашта аз сўи баъзе гурўҳҳо мавриди ситезу инкор қарор мегирифтанд, имрўз аз навъҳои мутадовили шеъри мо мебошанд ва иқтидору зарфияташон исбот шудааст.

Номбурда бо овардани мисолҳо изҳор дошт, ки шоири неруманд қодир аст, ки тозатарин мазмуну тасвирҳоро дар қолаби жанрҳои суннатӣ, аз ҷумла ғазал ва қасида бигунҷонад ва бо шеъри нави мудерн онҳоро пайванд бидиҳад.

Ҳамчунин гуфта шуд, ки навтарин навъи ашъор низ, ба монанди шеъри сапед, бо анъана ва суннати шеъри шоирони пешинамон беалоқа нестанд, реша дар замини шеъри куҳан доранд ва ҳамин пайванд боиси шукуфоиву боландии шеъри нав мегардад.

Шоирон Гулрухсор, Аскар Ҳаким ва Абдуллоҳи Раҳнамо перомуни масъалаи мазкур назарҳои судманд баён намуданд ва изҳори умедворӣ карданд, ки дар нишастҳои минбаъдаи маҳфил низ доираи маҳфил густариши бештар меёбад.

«ҚАВМ» ДАР ТЕАТРИ ХОРУҒ

 

Ҳунарпешагони Театри мусиқӣ-мазҳакавии ба номи Меҳрубон Назарови шаҳри Хоруғ дар остонаи Соли нави мелодӣ  ба кўдакону наврасон ва волидонашон намоишномаи «Қавм»-и Мансур Сурушро дар таҳияи коргардон Умед Хусрав пешкаш намуданд.

Намоишнома дар бораи зиндагии  одамоне қисса мекунад, ки бо ваҳдату муттаҳидӣ, дўстию рафоқат, вафодорию садоқат, заҳмату меҳнат алорағми ҳама гуна мушкилот пирўз мешаванд ва барои қавми худ зиндагии шоиста бунёд мекунанд.

Ҳунарпешаи ин театр Ҷобиршо Хубоншоев, ки дар намоишнома иҷрои нақши асосиро ба уҳда дорад, ба мухбири АМИТ “Ховар” изҳор дошт, ки дар гузашта мо чанд асари драматурги маъруфи тоҷик Мансур Сурушро ба саҳна гузоштем ва аз ҷониби тамошобинон хуш пазируфта шуданд.

“Ин бор низ иштибоҳ накардем ва дар рўзи аввали намоиш бо истиқболи гарми тамошобинон ва волидонашон рў ба рў шудем. Одатан ҷалб намудани таваҷҷуҳи кўдакон ба саҳна мушкил аст, аммо дар ин асар ҳодисаву воқеаҳо ончунон ҷолибу зебо тасвир ёфтааст, ки аз оғоз то анҷом диққати тамошобинонро ҷалб кард. Пас аз поёни намоишнома кўдакону волидон ба саҳна баромада, дар атрофи қаҳрамонони асар бо ҳунармандон мубодилаи афкор намуданд”, - афзуд номбурда.

Коргардони намоишнома Умед Хусрав гуфт, ки бо хоҳиши омўзгорону волидон ин намоишнома дар рўзҳои таътили зимистона  манзури тамошобинон гардонида шуд.

Қаблан низ ҳунарпешаҳои театри мазкур аз рўи асари Мансур Суруш «Вирод» намоишнома таҳия ва ба дўстдорони санъати театрӣ пешкаш карда буданд.

«КИТОБИ СОЛ - 2020»

Дар Вазорати фарҳанги Ҷумҳурии Тоҷикистон Озмуни ҷумҳуриявии «Китоби сол - 2020» аз рўйи се бахш ҷамъбаст  гардида, ғолибон бо Диплом ва маблағҳои пулӣ, ки аз 10 то 20 ҳазор сомонӣ муқаррар гардида буд, қадрдонӣ шуданд.

Дар бахши назм ҷойи аввалро китоби «Таронаборон»-и Сафар Аюбзодаи Маҳзун, зинаи дувумро китоби «Баҳор овардан осон нест»-и Бузургмеҳри Баҳодур ва китоби «Пайғом»-и Сафар Амирхон, мақоми сеюмро китоби «Таронаҳои ватандорӣ»-и Шаҳрия Аҳтамзод соҳиб гардиданд.

Дар  бахши наср ҷойи аввалро «Подош» (маҷмўаи ҳикояҳо)-и Сироҷиддин Икромӣ, мақоми дувумро китоби «Ман хабаркаши модарам»-и Неъматулло Худойбахш ва ҷойи сеюмро китоби «Бе ситора нестам»-и Зулфия Атоӣ ба даст оварданд. Дар бахши асарҳои публитсистӣ ҷойи аввал ба мақолаи «НБО-и «Роғун» - кафолати рушди устувори минтақа»-и Ҳасан Асоев, ҷойи дувум ба мақолаи «Гули худрўи Бартан»-и Сабрин ва ҷойи сеюм ба мақолаи «Ҷаҳони маънавии Чингиз Айтматов»-и Абдуғаффор Абдуҷаббор дода шуданд. Дар бахши асарҳои назми бачагона ҷойи аввалро «Бо ҳам мо -Тоҷикистон»-и Гулназар Келдӣ, ҷойи дувумро «Чашмасор»-и Муродалӣ Собир соҳиб шуданд. Дар бахши асарҳои насри бачагона ҷойи аввал ба китоби «Шоҳпарак ва рангинкамон»-и Маҷид Салим, ҷойи дувум ба китоби «Яке буд, яке набуд»-и Гулчеҳра Муҳаммадиева ва ҷойи сеюро ба китоби «Шодии талх»-и Сайидо Шарафӣ сазовор донистанд.

Ҳадаф аз баргузории Озмуни ҷумҳуриявии «Китоби сол - 2020» сазовор  пешвоз гирифтани 30-юмин солгарди Истиқлолияти  давлатии Ҷумҳурии Тоҷикистон буда, ҳамзамон дарёфти беҳтарин асарҳои бадеӣ ва илмӣ-тадқиқотии муосири тоҷик, ки ҷавобгўи меъёрҳои санъати сухан ва забони адабӣ буда, мазмуну муҳтавои онҳо мавзўъҳои худшиносии миллӣ, арҷгузорӣ ба рукнҳои давлатдорӣ, таҳкими сулҳу субот ва амният, садоқат ба Ватан бахшида шудаанд,  мебошад.

Тавре сардори Раёсати табъу нашр ва матбуоти Вазорати фарҳанги Ҷумҳурии Тоҷикистон Раҳмоналӣ Мирализода ба хабарнигори АМИТ «Ховар» иброз дошт,  эълони Озмуни ҷумҳуриявии «Китоби сол - 2020» дар ҳафтаномаи «Адабиёт ва санъат»  чоп шуда буд. Ба озмун аз тарафи муаллифон 39 унвон китобҳои тозанашри бадеии назму наср, публитсистӣ ва назму насри бачагона пешниҳод гардид.

Ёдовар мешавем, ки дар ҳайати ҳакамони озмуни мазкур – Раиси Иттифоқи нависандагони Тоҷикистон Низом Қосим (раис), муовини вазири фарҳанги Ҷумҳурии Тоҷикистон Қурбоналӣ Абдураҳимзода (муовини раис) ва  шоирону нависандагони маъруфи тоҷик шомил гардида буданд.

АДИБОНИ ҶАВОН ҶОИЗАДОР ШУДАНД

 

Чанде пеш дар Кохи «Суруш»-и пойтахт маросими ҷоизасупории Кумитаи кор бо ҷавонон ва варзиши назди Ҳукумати Ҷумҳурии Тоҷикистон баргузор гардид. Барои дастовардҳо дар соҳаи адабиёт ба ҷоизаи  мазкур  узви Иттифоқи нависандагони Тоҷикистон Бузургмеҳри Тоҷиддин, корманди маҷаллаи «Паёми Суғд» Фарзонаи Зарафшонӣ ва корманди Донишгоҳи миллӣ, муҳаққиқи ҷавон Рустам Наботӣ сазовор дониста шуданд.

Диплом ва маблағи ҷоиза дар фазои тантанавӣ аз ҷониби муовини Сарвазири Ҷумҳурии Тоҷикистон Матлубахон Сатторӣ ва роҳбарияти Кумитаи кор бо ҷавонон ва варзиш тақдим гардид.

РАҲНАВАРДИ ЗАРЁБ НАВИСАНДАИ ЗАБАРДАСТИ АФҒОНИСТОН ДАРГУЗАШТ

 

Адабиёти форсии тоҷикӣ талафоти бузург дод. Чанде пеш нависандаи забардасти Афғонистон Раҳнарварди Зарёб дар синни 76-солагӣ чашм аз ҷаҳон барбаст. Марҳум аз шумори нависандагоне буд, ки асарҳояшро ҳам дар ватанаш ва ҳам дар кишварҳои дигари форсизабон бо шавқу рағбат мехонданд, эътироф мекарданд ва дўст медоштанд.

Раҳнаварди Зарёб донишомўхтаи риштаи рўзноманигории Донишгоҳи Кобул буда, ҳамзамон дар Англия низ таҳсили илм кардааст. То кунун аз ин нависандаи тавоно китобҳои зиёди роману қисса ва ҳикояҳо ба дасти хонандагон расидаанд. «Овозе аз миёни қарнҳо», «Марди кўҳистон», «Дўсте аз шаҳри дур» ва ғайраҳо аз қабили асарҳое мебошанд, ки дар тўли солҳои фаъолияти эҷодияш интишор ёфта, ўро миёни хонандагон шуҳратёр намудаанд. Шодравон дар тарҷумаи осори бадеӣ низ дасти расо дошт ва китобҳои тарҷумаву суҳбатҳояшро бо номҳои «Пироҳанҳо», «Ҳошияҳо» ва «Гунги хобдида» ба табъ расонидааст.

Идомаи: РАҲНАВАРДИ ЗАРЁБ НАВИСАНДАИ ЗАБАРДАСТИ АФҒОНИСТОН ДАРГУЗАШТ

ОИНАИ РАВШАНИ ДИЛ

Тавре қаблан хабар додем, 7 декабр  дар Китобхонаи миллии Тоҷикистон даври ниҳоии Озмуни ҷумҳуриявии «Фурўғи субҳи доноӣ китоб аст» аз рўи панҷ номинатсия оғоз гардид.

Идомаи: ОИНАИ РАВШАНИ ДИЛ

АБДУҚОДИР МАНИЁЗОВ ВА РУШДИ ИЛМИ АДАБИЁТШИНОСӢ

 

Бо ташаббуси кафедраи назария ва адабиёти навини форсии тоҷикии факултети филологияи Донишгоҳи миллии Тоҷикистон ва Иттифоқи нависандагони Тоҷикистон 5 декабри соли 2020 дар Толори бузурги Шаҳраки донишҷўёни ДМТ бахшида ба 90-солагии адабиётшиноси маъруф ва наттоқу ходими намоёни давлатию ҷамъиятӣ Абдуқодир Маниёзов конфронси илмию амалии "Абдуқодир Маниёзов ва рушди илми адабиётшиносӣ" баргузор гардид. Дар конфронс вазири маориф ва илми Ҷумҳурии Тоҷикистон, академик М. Имомзода, Раиси Иттифоқи нависандагони Тоҷикистон Низом Қосим, ректори ДМТ, профессор Қ. Хушвахтзода, директори Институти забон ва адабиёт ба номи А. Рўдакӣ Б. Шарифзода, сармуҳаррири ҳафтаномаи «Адабиёт ва санъат» Парда Ҳабиб ва дигар адибону олимони шинохтаву пайвандони Абдуқодир Маниёзов ҳузур доштанд.

Идомаи: АБДУҚОДИР МАНИЁЗОВ ВА РУШДИ ИЛМИ АДАБИЁТШИНОСӢ

СУРОҒА

  • (+992 37) 224-57-37 | (+992 37) 224-57-67
  • Этот адрес электронной почты защищен от спам-ботов. У вас должен быть включен JavaScript для просмотра.
  • 734025, Ҷумҳурии Тоҷикистон, шаҳри Душанбе. хиёбони Исмоили Сомонӣ 8
  • FAX (+992 37) 224-57-37

Copyright © 2017.  All rights Reserved